Mae maethu yn ffordd hyfryd o wneud gwahaniaeth i fywyd plentyn, ac yng Nghymru, mae mwy o aelodau o’r gymuned LHDTC+ yn dod yn deuluoedd maeth. Ym mis Ionawr 2025, mae dros 50 o aelwydydd LHDTC+ yn maethu gyda Maethu Cymru, ac mae’r niferoedd yn tyfu bob blwyddyn.
Ond, beth sydd ei angen i fod yn ofalwr maeth, a beth yw agweddau unigryw maethu LHDTC+?
Mae A, sydd yn 47 oed, ac wedi bod yn ofalwr maeth ers dros 4 blynedd, wedi rhannu’r profiad o faethu hefyd.
Gadewch i ni weld.
a all cyplau hoyw faethu?
Yn bendant! P’un a ydych chi’n sengl, mewn cwpl, yn briod neu’n byw gyda’ch gilydd, gallwch faethu. Efallai fod gennych blant gartref yn barod, ond nid oes angen unrhyw brofiad blaenorol o fagu plant arnoch i faethu.
Os ydych chi’n gwneud cais fel cwpl a’i bod yn berthynas newydd, bydd angen i chi fod wedi bod yn byw gyda’ch gilydd am o leiaf chwe mis cyn dechrau’r asesiad gyda’ch gilydd. Ond peidiwch â phoeni, gallwch gasglu gwybodaeth a pharatoi ar unrhyw adeg.
Nid oes angen profiad blaenorol o ofalu am blant arnoch o reidrwydd i fod yn rhiant maeth, ond gall fod yn fuddiol. Efallai y bydd gennych gyfoeth o brofiad gofal plant anffurfiol sy’n dod o wahanol weithgareddau a rolau bob dydd, fel gwarchod plant neu ofalu am blant teulu neu ffrindiau.
Er nad yw profiad blaenorol gyda phlant yn orfodol, nod yr hyfforddiant a’r cymorth a ddarperir yw rhoi’r sgiliau angenrheidiol i chi ofalu am blant maeth.
Ar adeg fy asesiad maethu, roeddwn i’n sengl, ac roedd fy mhlentyn ieuengaf newydd symud i’w gartref ei hun. Fe wnaeth fy mhlant fwydo i mewn i’r broses asesu gan ddarparu ‘datganiadau personol’ amdana i fel rhiant.
cydbwyso gwaith a maethu
Un cwestiwn cyffredin yw a oes angen i un partner roi’r gorau i weithio. Y newyddion da yw y gall gweithio a maethu fynd law yn llaw. Bydd angen i chi gael cyflogwr sy’n deall, rhywfaint o hyblygrwydd, ac amser.
Mae rhai cyplau’n dewis lleihau eu horiau gwaith neu mae un partner yn rhoi’r gorau i weithio, ond mae hyn yn dibynnu ar eich sefyllfa ariannol a’r math o faethu rydych chi’n ei ddewis.
Darllenwch fwy: Allwch chi weithio’n llawn amser a bod yn rhiant maeth?
I fi, rwy’n gweithio’n rhan amser (3 diwrnod yr wythnos) ac yn ffodus i gael trefniadau gweithio hyblyg sydd hefyd yn cynnwys gweithio gartref llawer o’r amser. Pan oeddwn i’n sengl ac yn byw ar fy mhen fy hun gyda phlentyn maeth, roeddwn i’n gallu cydbwyso bywyd cartref a gwaith gan fod gan y plentyn maeth bresenoldeb da yn yr ysgol.
maethu yn erbyn mabwysiadu
Mae penderfynu rhwng maethu a mabwysiadu yn dibynnu ar yr hyn rydych chi ei eisiau mewn bywyd. Ydych chi eisiau bod yn rhiant parhaol, neu a ydych chi am gael plant yn eich bywyd mewn ffordd fwy hyblyg?
Gall maethu gyd-fynd â’ch ffordd o fyw a’ch gwaith, gan eich galluogi i ofalu am bobl ifanc hŷn, mwy annibynnol neu hyd yn oed faethu’n rhan amser.
Mae mabwysiadu, ar y llaw arall, fel arfer yn cynnwys plant iau a babanod ac mae’n ymrwymiad mwy parhaol.
Darllen mwy: 5 gwahaniaeth rhwng maethu a mabwysiadu
beth yw manteision maethu LHDTC+?
Mae yna nifer o fanteision i faethu LHDTC+:
- Efallai fydd eich perthynas â’r plentyn yn haws os nad ydych chi’n cael eich ystyried fel rhywun sy’n ceisio cymryd lle eu rhieni.
- Mae rhai gofalwyr maeth LHDTC+, ac yn enwedig fel cwpl gwrywaidd, hefyd wedi profi perthynas gadarnhaol iawn gyda’r fam fiolegol am yr un rheswm.
- Efallai y byddwch yn deall yn well y gwahaniaethu neu’r heriau y mae pobl ifanc â phrofiad o ofal yn eu hwynebu a bod mewn sefyllfa dda i gefnogi pobl ifanc gyda’u rhywioldeb eu hunain.
- Wrth faethu ieuenctid LHDTC+, gallwch ddangos esiampl.
- Mae Maethu Cymru hefyd yn cynnig aelodaeth aur am ddim i New Family Social, gan ddarparu cefnogaeth LHDTC+ benodol.
Yn bendant, mae sawl mantais i fod yn ofalwr maeth LHDTC+. Rydym yn gallu rhannu ein safbwyntiau a’n profiadau unigryw a all helpu plant maeth i ddeall a gwerthfawrogi amrywiaeth a chynwysoldeb.
Mae bod yn agored am ein rhywioldeb wedi galluogi pobl ifanc i rannu eu meddyliau a’u teimladau eu hunain gyda ni. Rhannodd person deuddeg oed gyda ni eu bod yn ddeurywiol, gan eu bod yn teimlo’n gyfforddus ein bod ni yn agored, yn derbyn ac na fydden ni’n barnu mewn unrhyw ffordd.
beth yw anfanteision maethu LHDTC+?
Yn onest, mae’n anodd meddwl am unrhyw anfanteision sylweddol.
Gweithwyr cymdeithasol a gofalwyr maeth yw rhai o’r bobl mwyaf agored y byddwch chi’n gweithio gyda nhw, ac rydych chi’n annhebygol o wynebu gwahaniaethu.
Er gwaethaf hyn, a’r ffaith fod nifer y gofalwyr maeth LHDTC+ yn cynyddu, mae’r rhan fwyaf o ofalwyr maeth yn dal i fod yn eu 50au ac yn gyplau heterorywiol gwyn. Mae hyn yn golygu, er bod gan rai ardaloedd lawer o ofalwyr maeth LHDTC+, efallai na fydd hyn yn wir mewn ardaloedd eraill.
Yn ogystal, gall fod angen teithio i rai digwyddiadau sy’n rhoi cymorth LHDTC+ penodol.
Nid wyf wedi wynebu unrhyw heriau penodol fel gofalwr maeth LHDTC+. Fy nhaith faethu gychwynnol oedd fel gofalwr sengl. Cwrddais â fy mhartner presennol ychydig fisoedd ar ôl cael fy nghymeradwyo. Ni phrofodd yr un ohonom unrhyw negyddoldeb, gwahaniaethu na rhagfarn gan y gymuned, rhieni maeth eraill, na’r system gofal maeth ei hun. Rydym wedi teimlo ein bod yn cael cefnogaeth yn ein rôl ac mae gennym fynediad at rwydweithiau cymorth fel gweithiwr cymdeithasol goruchwyliol, mentoriaid cymheiriaid, mynediad at grwpiau hyfforddi a chymorth. Nid ydym yn cael ein trin yn wahanol i unrhyw ofalwr maeth arall. Rydym yn cael ein parchu a’n gwerthfawrogi ac mae pobl yn gwrando arnom.
cyfrinachedd a chefnogaeth
Eich busnes chi yn amlwg yw eich rhywioldeb, ac mae gennych hawl i breifatrwydd. Fodd bynnag, mae angen i chi fod yn barod i fod yn agored amdano yng nghyd-destun maethu.
Pan fyddwch yn dechrau eich asesiad, bydd gweithiwr cymdeithasol yn cael ei neilltuo i chi, fydd yn casglu gwybodaeth amdanoch chi a’ch bywyd. Er mwyn deall eich anghenion, a gallu eich cefnogi, mae’n syniad da bod yn agored gyda’ch asesydd o’r dechrau.
Yna caiff y wybodaeth hon ei defnyddio i lunio adroddiad a welir gan y rhai sydd angen cymeradwyo eich cais maethu yn unig. Byddwch yn gweld copi o’r adroddiad hwn cyn ei rannu.
Mae bod yn agored ac yn onest yn bwysicach fyth pan fyddwch chi’n maethu plentyn. Nid ydym yn awgrymu y dylai gofalwyr ddweud wrth blentyn yn eu gofal yn awtomatig beth yw eu rhywioldeb. Bydd hyn hefyd yn dibynnu ar oedran a dealltwriaeth y plentyn rydych yn gofalu amdano. Ond mae plant, yn enwedig y rhai sydd â phrofiad o fod mewn gofal, yn dditectifs rhagorol.
Os cewch eich holi gan berson ifanc a ddim yn onest, neu os bydd plentyn yn darganfod mewn ffordd arall, gallai hyn effeithio ar ei ymddiriedaeth ynoch chi. Neu, gallai person ifanc geisio defnyddio’r wybodaeth hon fel ffordd o gael ei ffordd ei hun, gan eich rhoi mewn sefyllfa fregus.
Felly, mae angen i ofalwyr fod yn barod i fod yn agored.
Mae trafod eich rhywioldeb yn ystod y broses faethu yn bwysig am sawl rheswm. Chi yw chi ac mae bod yn agored a thryloyw am eich rhywioldeb a phob agwedd ar eich bywyd yn bwysig wrth ddangos eich gonestrwydd. Rydych wedi ennill cymaint o sgiliau trosglwyddadwy drwy gydol eich bywyd a all fod o fudd i chi fel gofalwr maeth. Peidiwch â chuddio pwy ydych chi na’r hyn sydd gennych i’w gynnig neu eich bod yn barod i ddysgu. Gall gwybod am eich rhywioldeb eich helpu i’ch paru â phlant a allai elwa o’ch dealltwriaeth a’ch cefnogaeth.
wedi mabwysiadu eisoes? gallwch faethu hefyd!
Os ydych eisoes wedi mabwysiadu, gallwch faethu hefyd.
Fel mabwysiadwr, byddwch yn deall pa mor bwysig oedd gofalwyr maeth yn nyddiau cynnar eich plentyn mewn gofal. Byddwch wedi cwrdd â gofalwyr maeth yn ystod cyflwyniadau i’ch plentyn ac efallai eich bod yn dal mewn cysylltiad. Bydd y wybodaeth y byddwch wedi’i datblygu fel mabwysiadwr yn werthfawr wrth faethu.
Er y bydd angen i chi fynd trwy asesiad arall, gellir defnyddio rhywfaint o’ch asesiad mabwysiadu gwreiddiol i sicrhau proses effeithlon a di-ffwdan.
allech chi helpu plentyn?
Mae maethu LHDTC+ yng Nghymru ar gynnydd, ac mae’n ffordd wych o gael effaith gadarnhaol ar fywyd plentyn. P’un a ydych chi’n sengl neu mewn perthynas, yn gweithio ai peidio, gall maethu gyd-fynd â’ch bywyd a darparu profiad gwerth chweil.
Os ydych chi’n ystyried maethu, cysylltwch â Maethu Cymru i ddysgu mwy a dechrau ar eich taith heddiw! 🌈👨👨👧👦👩👩👧👦
darllenwch fwy:
Ein Cartref Cariadus: Gofalwyr Maeth LHDTC+ – maethu cymru nghaerdydd
LGBTQ + Maethu: stori Arron a Mat – maethu cymru blaenau gwent
mae’r gofalwyr maeth, zahra ac annie yn rhannu eu siwrnai maethu ar gyfer wythnos mabwysiadu a maethu lhdtc+
cariad heb ffiniau: taith kate a lisa fel gofalwyr maeth lhdtc+ – maethu cymru wrecsam
Adoption, Fostering & Tea: The New Family Social Podcast | Podcast on Spotify
