byw gofal maeth?

Yma, rydym wedi crynhoi popeth sydd angen i chi ei wybod am beth yw maethu, a sut mae’n gallu bod yn rôl sy’n dwyn llawer o foddhad ac yn newid bywyd un plentyn, neu lawer. Darllenwch fwy i ddysgu beth yw gofal maeth, ac a yw’n iawn i chi.

beth yw maethu?

Gofal maeth yw derbyn plentyn fel rhan o’ch teulu pan fydd yn rhaid iddynt fod i ffwrdd o’u teulu eu hunain. Mae’n golygu eu cefnogi a darparu lle diogel a chariadus iddynt fyw. Gallai fod am noson, am fis, am flwyddyn neu am sawl blwyddyn. Yn ei hanfod, ystyr maethu yw ymroddiad i wneud gwahaniaeth a newid cwrs bywyd plentyn.

Mael teulu maeth yn gallu golygu dechrau newydd a chartref newydd, ond nid yw hyn yn golygu dileu’r gorffennol – mae’r cysylltiadau pwysig sydd gan blant maeth â’u teuluoedd biolegol yn cael eu cynnal hefyd.

Mae cadw ffrindiau, mannau cyfarwydd a phopeth sy’n bwysig i’r plentyn yn ganolog i’r hyn a wnawn. Dyna pam byddwn bob amser yn blaenoriaethu cadw plant yn eu cymuned leol os mai dyna’r peth iawn iddyn nhw.

Tasg gofalwr maeth yw sicrhau bod y plentyn yn teimlo’n ddiogel ac yn hapus a’i fod yn cael ei gefnogi. Ein rôl ni yw eich cefnogi ym mhob ffordd y gallwn.

Darllenwch fwy am ystadegau maethu yng Nghymru.

beth yw teulu maeth?

Does dim y fath beth â theulu maeth ‘arferol’. Rydym yn dathlu amrywiaeth ac unigrywiaeth ein teuluoedd maeth. Mae maethu’n ymwneud â diwallu anghenion unigol pob plentyn yn ein gofal – mae angen rhywbeth gwahanol ar bob un ohonynt. Felly, os byddwch chi’n penderfynu dod yn ofalwr maeth, dyna pam nad oes modd cymharu eich amgylchiadau â rhai unrhyw un arall – gall pawb gynnig rhywbeth.

Mae ‘teulu’ yn cyfeirio atoch chi, y rhai sy’n byw yn eich cartref gyda chi, a’ch perthnasau agos – megis eich rhieni eich hun. Mae plant maeth yn derbyn croeso cynnes gan bawb sy’n rhan o’r broses.

Darllenwch fwy am y gwahanol fathau o faethu.

pam mae plant yn cael eu dwyn i ofal maeth?

Yn union fel nad oes un teulu maeth clasurol, mae pob plentyn maeth yn unigol iawn. Mae pobl ifanc yn dod i’n gofal am sawl rheswm, yn aml oherwydd digwyddiadau y tu hwnt i’w rheolaeth.

O esgeulustod, camdriniaeth a chwalfa deulu i salwch meddwl rhieni neu gamddefnyddio sylweddau, yr hyn y mae angen i rieni maeth ei ddeall yw y gallai fod gwahanol ffactorau sy’n ei gwneud hi’n anniogel i blant aros yn eu cartrefi eu hunain.

Nid yw plentyn maeth yn cael ei ddiffinio gan oedran, chwaith. Mae gennym blant o bob oed yn ein gofal – o fabanod i bobl ifanc yn eu harddegau, a hyd yn oed rhieni ifanc gyda’u plant bach eu hunain i ofalu amdanynt.

Ni waeth beth fo’u hamgylchiadau, iddyn nhw, bydd ystyr gofal maeth yr un peth – bod mewn amgylchedd cadarnhaol lle gallan nhw feithrin perthnasoedd hirdymor a magu eu hyder.

Darllenwch fwy am bwy sydd angen ei faethu?

beth yw cartref maeth?

Weithiau gall fod dryswch ynglŷn â beth yw cartref maeth, gan ei fod yn gallu cyfeirio at gartref teulu maeth neu gael ei ddefnyddio fel cyfystyr am gartref plant.

Yn achos teulu maeth, mae cartref maeth yn fwy na tho syml dros ben plentyn; mae’n lle diogel lle maen nhw’n teimlo eu bod yn cael eu cefnogi, ac yn gallu derbyn arweiniad wrth iddyn nhw symud ymlaen i ddyfodol mwy sefydlog. Mae byw mewn amgylchedd cartref sefydlog, cariadus a phrofi sylw personol gan rieni maeth yn gallu rhoi ymdeimlad gwirioneddol o berthyn i blant, gan feithrin perthnasoedd cadarnhaol a’u galluogi i ddatblygu sgiliau bywyd.

Mae cartref plant, ar y llaw arall, yn cyfeirio at leoliad lle mae nifer o blant yn byw gyda’i gilydd, dan oruchwyliaeth staff profiadol. Mae’r cartrefi hyn yn hanfodol wrth helpu i roi’r gofal a’r strwythur hanfodol sydd eu hangen ar bobl ifanc. Weithiau gallan nhw hefyd fod yn fwy addas i blant hŷn, sydd wedi arfer â mwy o annibyniaeth yn eu bywyd cartref, ac mae meithrin perthynas â staff yn gallu bod yn haws iddyn nhw ymdopi ag ef na bod yn rhan o deulu maeth.

Mewn rhai achosion, gallai pobl ifanc ddechrau mewn cartref plant – sy’n eu helpu i ddod i arfer â threfn – yna symud i amgylchedd teuluol pan fyddan nhw’n teimlo’n barod. Yn y modd hwnnw, gallan nhw brofi bywyd teuluol, a meddu ar sgiliau gwell os byddan nhw’n cael teulu eu hunain yn y dyfodol.

beth yw rôl rhiant maeth?

Mae rôl gofalwr maeth yn cael ei lunio gan bob sefyllfa unigryw ac wrth iddynt ddod o hyd i’w ffordd trwy heriau bywyd ynghyd â’u plant maeth.

Mae ystyr gofal maeth yn cwmpasu tasgau rhianta o ddydd i ddydd, rhai emosiynol a chorfforol, megis helpu gyda’r ysgol, amseroedd bwyd a threfniadau amser gwely. Neu dasgau mwy heriol, megis cefnogi plant gyda’u teimladau a’u hemosiynau, cadw mewn cysylltiad â’u teuluoedd geni, cefnogi pobl ifanc yn eu harddegau wrth iddynt symud ymlaen i annibyniaeth, neu hyd yn oed addysgu pobl ifanc am rianta.

Darllenwch fwy am beth yw rôl gofalwr maeth?

cwestiynau cyffredin

ydy rhieni maeth yn cael eu talu?

Ydyn, mae rhieni maeth yn derbyn cymorth ariannol – lwfans penodol ar gyfer pob plentyn maeth yn eu gofal, ynghyd â lwfans ychwanegol iddynt eu hunain. Er nad yw gofal maeth, trwy ddiffiniad, yn ymwneud â’r arian, y bwriad yw i’r lwfansau hyn helpu i dalu treuliau pob dydd, ynghyd ag unrhyw gostau ychwanegol.

Y tu hwnt i’r lwfansau ariannol hael, mae gan ofalwyr maeth fynediad i fuddion ychwanegol, o ostyngiadau lleol i arweiniad arbenigol a chyfleoedd hyfforddi.

Darllenwch am ein cefnogaeth a manteision.

pwy all faethu?

Fel y soniwyd yn gynharach, does dim diffiniad unigol o beth yw gofalwr maeth. Mae ein rhieni maeth yn dod o bob cefndir, pob un yn dylanwadu ar beth yw maethu yn ei ffordd ei hun.

P’un a ydych chi’n sengl neu mewn perthynas, yn byw yn eich cartref eich hun neu’n rhentu, yn gweithio’n llawn amser neu’n ddi-waith, yr hyn sy’n gwneud teulu maeth yw’r gallu – a’r parodrwydd – i roi cartref sefydlog, cariadus a chefnogol i blentyn mewn angen.

Nid oes gennym ofynion llym ynghylch oedran, rhywedd, cyfeiriadedd rhywiol neu statws priodasol, ac nid meddu ar anifeiliaid anwes, neu hyd yn oed eich plant eich hun, yn rhwystr i ddod yn ofalwr maeth.

Dyma ragor o fanylion am bwy all faethu.

beth yw’r gwahanol fathau o ofal maeth?

Mae’r gofal maeth sydd orau i blentyn yn dibynnu ar eu hanghenion unigryw, felly mae sawl math o faethu ar gyfer gwahanol sefyllfaoedd.

I gael mwy o fewnwelediadau, edrychwch ar ein dadansoddiad o fathau o faethu.

manteision maethu gyda maethu cymru

Gyda Maethu Cymru, mae maethu’n golygu ymuno â chymuned gefnogol sy’n eich paratoi ar gyfer hyfrydwch a heriau beth yw bod yn ofalwr maeth.

Fel rhwydwaith o wasanaethau awdurdod lleol, rydym yn sicrhau nad ydych byth ar eich pen eich hun – mae arbenigwr gofal maeth wrth law bob amser sy’n gallu cynnig cyngor, o’ch cais cyntaf i gymorth parhaus i rieni maeth.

Rydym wedi ymrwymo i les ein plant, gan ymdrechu i’w cadw gyda theuluoedd maeth yn eu cymunedau lleol pryd bynnag y bo modd.

Mae pob plentyn yr ydym yn eich paru â nhw yn gyfrifoldeb eu hawdurdod lleol – felly bydd gennym gyfoeth o wybodaeth am eu hanes, y gallwn gael mynediad iddi ar unrhyw adeg i ddarparu mwy o gyd-destun i’w hymddygiadau a’ch paratoi’n well i gefnogi eu lles.

Ac, fel sefydliad dielw, mae ein holl adnoddau’n mynd yn uniongyrchol i ddarparu’r gofal gorau ac adeiladu dyfodol mwy disglair i bobl ifanc ledled Cymru.

Darllenwch fwy o resymau pam ein dewis ni.

sut mae dod yn ofalwr maeth

Os nad ydych yn siŵr o’r broses gwneud cais am ofal maeth, rydyn ni yma i helpu – gallwch gysylltu â ni dros y ffôn, mewn e-bost, neu drwy ffurflen ar-lein, a byddwn yn darparu arweiniad arbenigol bob cam o’r ffordd.

Y cyfan sydd angen ei wneud yw dod o hyd i’ch awdurdod lleol a chysylltu â nhw. Mae gan ein timau wybodaeth amhrisiadwy am y plant yn eu gofal a gallan nhw ddarparu’r holl wybodaeth sydd ei hangen arnoch, gan eich cefnogi drwy’r broses o ddod yn ofalwr maeth.