pa mor hir mae’r broses faethu’n ei gymryd?
Mae taith pawb yn wahanol. Mae maethu yn benderfyniad i wneud gwahaniaeth gwirioneddol i fywydau plant yn eich cymuned. Efallai y bydd yn cymryd ychydig o amser i chi gyrraedd yno, ond y cam cyntaf yw’r mwyaf pwerus.
Gall gymryd tua 6 mis i fynd drwy’r broses faethu gychwynnol, ond mae hynny oherwydd bod gwiriadau a chyfeiriadau lluosog y mae angen iddynt ddigwydd i sicrhau bod pob plentyn yn ymuno â chartref diogel a chariadus.
O’ch ymholiad cyntaf i’r golau gwyrdd terfynol, gadewch i ni nodi yn union beth sy’n digwydd yn ystod y broses, a pha mor hir y mae pob cam yn debygol o’i gymryd.
eich ymholiad cychwynnol
Y cam cyntaf yn eich taith i fod yn ofalwr maeth yw cyflwyno ymholiad i roi gwybod i ni fod gennych ddiddordeb yn dysgu mwy am faethu.
I wneud hyn, chwiliwch am eich tîm Maethu Cymru lleol yma ar ein safle ac yna byddwn yn rhoi gwybod i chi sut i gysylltu.
Ar ôl cydnabod eich ymholiad, bydd un o’n tîm yn cysylltu o fewn ychydig ddiwrnodau i sgwrsio ar y ffôn a threfnu dyddiad ac amser ar gyfer ymweliad cartref. Yn ystod hyn, byddwn yn dod i wybod ychydig mwy amdanoch chi a byddwch chi’n gallu gofyn eich cwestiynau chi i ni hefyd!
Os ydych chi’n hoffi’r hyn rydych chi’n ei glywed, a’n bod ni’n teimlo eich bod chi’n barod i symud ymlaen i fod yn ofalwr maeth, gallwn ni ddechrau ar y broses.
asesiad meddygol
Nid ydym yn disgwyl i bob gofalwr maeth fod yn Olympiad, ond mae’n bwysig bod gennych safon o iechyd corfforol a meddyliol sy’n eich galluogi i ofalu am blentyn.
Mae hyn yn golygu y gofynnir i chi am eich hanes iechyd, yn ogystal â’ch iechyd corfforol presennol. Bydd angen archwiliad, gyda’ch meddyg teulu lleol fel arfer.
Gofynnir cwestiynau ychwanegol i chi hefyd am eich ffordd o fyw, fel a ydych yn ysmygu a pha mor aml rydych chi’n yfed alcohol.
Mae faint o amser y mae’r rhan hon o’r broses yn ei gymryd mewn gwirionedd yn dibynnu ar eich argaeledd chi a’ch meddyg teulu. Ar ôl i’r archwiliad meddygol gael ei gwblhau, bydd eich meddyg teulu yn trosglwyddo ei asesiad i ni, drwy ein cynghorydd meddygol.
gwiriadau a chyfeiriadau
Er mwyn maethu plentyn, bydd angen i chi roi enwau canolwyr i ni, sy’n eich adnabod yn dda.
Mae hyn yn dechrau’r broses o gael dealltwriaeth well ohonoch chi fel person, a sut fyddwch chi fel gofalwr maeth.
Gall siarad â rhai o’ch ffrindiau, yn ogystal â phobl sydd wedi eich cyflogi chi, roi dealltwriaeth gyntaf dda i ni ohonoch chi a’ch ffordd o fyw.
gwiriadau GDG
Bydd angen i chi hefyd gydymffurfio â gwiriad GDG (Gwasanaeth Datgelu a Gwahardd). Mae gwiriad GDG yn ystyried a oes gan rywun unrhyw euogfarnau, gan gynnwys a oes unrhyw resymau pam na ddylent allu gweithio gyda grwpiau arbennig o agored i niwed, fel plant.
Mae’n well cael eich gwiriad GDG i mewn mor gyflym â phosibl, am ei fod fel arfer yn gallu cymryd tua wyth wythnos i’w brosesu.
Os ydych wedi byw dramor, gall hyn gymryd ychydig mwy o amser.
hyfforddiant paratoi
Mae hwn yn agoriad llygad 3 diwrnod, lle rydych chi’n cwrdd ag unigolion a theuluoedd eraill yn yr un sefyllfa â chi – sydd â diddordeb mewn maethu ond eisiau gwybod mwy. Weithiau gall hyn fod yn ddechrau ar gyfeillgarwch maethu hyfryd gyda rhywun ar eich cwrs.
Mae’r cwrs yn gyflwyniad i bynciau pwysig a rhywfaint o jargon hefyd. Bydd yn cynnwys popeth o dderbyn plant am bwy ydyn nhw a’u hunaniaeth i’r tîm ehangach sy’n gweithio o amgylch y plentyn a chyfathrebu gwybodaeth.
Bydd hefyd yn eich helpu i ddeall ymddygiad, sut i osod ffiniau, a’ch rôl fel gofalwr maeth yn hytrach na rhiant. Ac yn olaf, trafod sut brofiad yw’r adeg pan fydd plant yn symud ymlaen.
Y rhan fwyaf cofiadwy o’r cwrs yw pan ddaw hyn i gyd yn fyw gan ofalwr maeth go iawn yn rhannu ei brofiad ei hun.
pa mor hir mae’n ei gymryd i faethu plentyn?
Rhan hiraf y broses faethu yw eich cyfres o ymweliadau cartref, a all fel arfer gymryd hyd at chwe mis. Felly, dylech ganiatáu mor hir â hyn i bopeth ddod at ei gilydd.
Byddwch yn cael sawl ymweliad cartref gan weithiwr cymdeithasol penodedig i ddod i’ch adnabod yn well. Byddan nhw’n gofyn i chi beth sydd wedi dod â chi i’ch penderfyniad i faethu, eich perthnasoedd, ffordd o fyw cyffredinol, profiad gyda phlant, a mwy.
Dyma ein cyfle ni hefyd i’ch paratoi ar gyfer eich rôl fel gofalwr maeth, ehangu ar yr hyn a rannwyd yn eich cwrs hyfforddiant paratoi, a thrafod sefyllfaoedd posibl y gallech ddod ar eu traws.
Ni allwn eich paratoi ar gyfer popeth, ond gallwn rannu ein profiadau a chyflwyno cymaint o elfennau “beth os” ag y gallwn i dawelu eich meddwl, egluro ac archwilio pynciau gwahanol.
Ac mae angen i chi ddod i’n hadnabod ni hefyd, gan ein bod ni’n mynd i fod wrth eich ochr chi trwy’r adegau da a’r adegau anodd, am flynyddoedd lawer i ddod, gobeithio.
Mae’n gallu teimlo fel amser hir, ond peidiwch â phoeni – fe fyddwn ni yno gyda chi drwy’r amser, ac mae’n gwbl werth chweil.
pam ei fod yn cymryd mor hir â hyn?
Mae llawer o gamau ynghlwm wrth faethu plentyn i sicrhau eu bod yn cael eu lleoli mewn cartref diogel a sefydlog. Mae llawer o’r camau hyn yn dibynnu ar gyflymder trydydd partïon, fel eich geirdaon, meddyg teulu, a GDG, felly gall y broses gyfan amrywio o ran hyd.
Rydym hefyd yn cymryd ein hamser i sicrhau ein bod yn eich paru â phlant yr ydym yn teimlo sy’n gweddu orau i’ch cartref, eich sgiliau a’ch profiad. Byddwn ni’n dod i’ch adnabod chi a’ch teulu. Yn darganfod yr hyn rydych chi’n angerddol amdano, ac yn bwysicaf oll, pwy ydych chi.
Rydyn ni’n teimlo bod 6 mis yn rhoi amser i chi brosesu’r holl wybodaeth a gofyn cwestiynau wrth i chi fynd ymlaen – cwestiynau nad oeddech chi’n meddwl amdanyn nhw ar y dechrau, efallai.
Mae’n rhoi amser i chi fyfyrio, trafod gyda’ch teulu, deall a theimlo’n gyfforddus â’r lefel o ymrwymiad sydd ei angen a sicrhau ei fod yn iawn i chi a’ch teulu cyfan. Gallwn hefyd nodi meysydd yr hoffech ddysgu mwy amdanyn nhw.
Nid eich cartref chi a’ch cymuned yn unig sy’n bwysig i ni. Rydych chi fel unigolyn yn bwysig i ni ac, i baru yn y ffordd orau bosibl – a chreu’r dyfodol gorau posibl – mae angen i ni wybod popeth y gallwn.
y camau olaf
Unwaith bydd yr holl ffurflenni wedi’u llenwi a’r gwiriadau wedi’u cwblhau, bydd eich adroddiad asesu yn mynd at banel i’w adolygu. Bydd y panel yn gwneud yr argymhelliad terfynol ynghylch a ydych yn cael eich cymeradwyo fel gofalwr maeth.
Ar ôl i chi gael eich cymeradwyo, rhoddir sesiwn sefydlu i chi a bydd y broses o’ch paru â phlentyn (neu blant) yn dechrau.
Am fwy o wybodaeth, darllenwch ein herthygl ar wefan Sir y Fflint: Pam (i’w wneud yn iawn) y mae’n cymryd 6 mis i ddod yn ofalwr maeth
Am straeon personol, darllenwch: Ein taith faethu cam wrth gam neu paratoi ar gyfer panel maethu: beth i’w ddisgwyl
