dysgu a datblygu ar gyfer gofalwyr maeth

Ym Maethu Cymru, mae cymorth wrth wraidd popeth a wnawn – wrth weithio gyda phobl ifanc ac wrth arwain gofalwyr maeth ar eu taith. Dyna pam mae gennym gyfleoedd dysgu a datblygu ystyrlon ar bob cam o’r ffordd.

Er y gallai asiantaethau maethu ddefnyddio labeli fel ‘hyfforddiant gofal maeth’ neu ‘hyfforddiant i ofalwyr maeth’, fel gwasanaethau maethu Awdurdod Lleol ledled Cymru, mae’n well gennym y term ‘dysgu a datblygu’. Rydym yn credu bod llawer o ffyrdd o ennill sgiliau gwerthfawr fel rhan o’r gymuned faethu a’i bod yn broses barhaus, yn hytrach na chwrs untro.

Mae ein fframwaith dysgu a datblygu yn mynd y tu hwnt i hyfforddiant traddodiadol i ofalwyr maeth i gwmpasu dulliau ehangach, mwy hyblyg o ddysgu yn y byd go iawn. O rieni maeth newydd i ofalwyr maeth profiadol, gallwn gefnogi pawb i ennill sgiliau a magu hyder. Felly, gallwch dyfu, addasu a darparu’r gofal gorau posibl i’r bobl ifanc rydych yn eu maethu.

pam mae dysgu a datblygu’n bwysig

Mae rôl gofalwr maeth yn werth chweil, ond gall hefyd fod yn heriol – ac mae, heb os, bob amser yn esblygu. Dyna pam mae ein dysgu a’n datblygu’n mynd y tu hwnt i’r cwrs hyfforddiant maeth cychwynnol.

Mae gennym wahanol raglenni sydd wedi’u dylunio i fodloni eich anghenion – o gymorth yn eich blwyddyn gyntaf fel rhiant maeth i feysydd arbenigol y gallwch uwchsgilio ynddynt, o weithdai, i weithio ochr yn ochr â gweithwyr proffesiynol eraill, i ddarllen annibynnol.

Newydd ddechrau?  Dysgwch fwy am beth yw gofal maeth?

cyfleoedd dysgu a datblygu: pob cam o’r ffordd

Mae pob gofalwr maeth yn dod â’i brofiadau a’i ddiddordebau unigryw ei hun, felly nid oes rhaglen hyfforddiant un maint i bawb.

Er bod rhai cyrsiau y mae angen i bob gofalwr maeth eu cwblhau – oherwydd eu bod yn darparu gwybodaeth a sgiliau hanfodol i bawb – gellir teilwra hyfforddiant y tu hwnt i hynny i weddu i’ch anghenion unigol, eich gwybodaeth bresennol, a’r plant penodol yn eich gofal.

Ar ôl i chi gwblhau’r camau angenrheidiol i ddod yn ofalwr maeth cymeradwy, bydd gennych yr hyblygrwydd i ddewis yr hyn rydych yn parhau i’w ddysgu a sut rydych yn parhau i ddysgu.

Dyma drosolwg cyflym o sut mae dysgu a datblygu’n gweithio ym mhob cam o’r daith faethu:

cyn i chi ddechrau: hyfforddiant cyn cymeradwyaeth

Mae’r cwrs cyntaf hwn, y cyfeirir ato’n aml fel hyfforddiant cyn cymeradwyaeth neu baratoi, wedi’i ddylunio i roi mewnwelediad i chi ar sut olwg sydd ar faethu o ddydd i ddydd: o’r ymarferol i’r emosiynol.

Mae’r Hyfforddiant Sgiliau i Faethu gan Y Rhwydwaith Maethu yn gwrs sefydledig yn genedlaethol y mae’r mwyafrif o’n hawdurdodau lleol yn ei ddefnyddio. Yn aml yn cael ei ddisgrifio fel rhywbeth sy’n agor y llygaid, bydd yr Hyfforddiant Sgiliau i Faethu (neu fersiynau eraill o hyfforddiant paratoi) yn eich tywys trwy bynciau fel rôl gofalwr maeth, cyflwyno maethu i’ch cartref a’ch teulu, mathau amrywiol o faethu, a chefnogi plant maeth tra byddant gyda chi, a phan fyddant yn symud ymlaen.

Yn ystod yr hyfforddiant hwn, cewch gyfle hefyd i gwrdd â gofalwyr eraill sydd newydd ddechrau eu taith – elfen gymdeithasol werthfawr a all eich helpu i ffurfio cysylltiadau hirhoedlog.

“Gwnaeth y cwrs hyfforddiant tri diwrnod agor fy llygaid, mae’n anodd clywed am yr holl fathau o esgeulustod y gall plant bach wynebu, yn enwedig gan ei fod mor agos at adref – plant sy’n byw yn ein hardal leol. Cawson ni gyfle i gwrdd â gofalwyr maeth, darpar ofalwyr a mwy o weithwyr cymdeithasol a chwaraeodd ran bwysig o ran ein helpu i ddeall yr hyn oedd o’n blaen!” Gofalwr Maeth

Fel cam cyntaf eich taith faethu, dyma’r cyfle perffaith i chi ofyn cwestiynau, deall realiti bob dydd bod yn ofalwr maeth, a myfyrio ar a yw’n iawn i chi.

sefydlu: dechrau’n hyderus

Ar ôl i chi gael eich cymeradwyo fel gofalwr maeth, byddwch yn cael eich sefydlu – bydd hyn yn cynnwys hanfodion hyfforddiant maeth ymarferol y mae angen i chi eu deall (fel arfer) cyn i chi gael eich paru â’ch plentyn maeth cyntaf.

Yn ystod sefydlu, bydd eich tîm awdurdod lleol yn ymdrin â phynciau fel ei weithdrefnau craidd, pa gymorth sydd ar gael i chi, cadw cofnodion, cyfathrebu, arferion gofalu diogel, a gweithio gyda theuluoedd biolegol.

eich blwyddyn gyntaf: dysgu a thwf hanfodol

Rydym hefyd wedi dylunio ‘Eich Blwyddyn Gyntaf’ fel rhaglen sy’n helpu gofalwyr maeth trwy eu 12 mis cyntaf gyda dysgu hanfodol a sicrhau y gallwch ddod o hyd i’r cymorth iawn, gan y bobl iawn, ar yr adeg iawn. Gan adeiladu ar yr holl sgiliau a gwybodaeth rydych wedi’u hennill yn ystod eich hyfforddiant gofal maeth cychwynnol, mae’r rhaglen hon yn canolbwyntio ar ddysgu ymarferol yn seiliedig ar eich profiadau bywyd go iawn.

Mae’n ymwneud â heriau y gallech eu hwynebu’n naturiol yn ystod eich blwyddyn gyntaf – o weithio gyda phawb yn nhîm gofal eich plentyn maeth i ddatblygiad ac ymlyniad plant, deall a rheoli eu hymddygiad, yn ogystal â meithrin gwydnwch emosiynol.

Edrychwch ar rai o’r cwestiynau mwyaf cyffredin am faethu.

dysgu a datblygu parhaus

Wrth gwrs, nid yw dysgu yn dod i ben yno. Mae maethu yn daith barhaus – a dyna pam rydym wedi creu fframwaith dysgu a datblygu a all eich cefnogi wrth i chi ddatblygu eich sgiliau fel gofalwr. Mae rhai o’r pynciau craidd rydym yn eu trafod yn cynnwys:

• Diogelu
• Iechyd a lles
• Addysg a datblygu
• Cymorth cyntaf, ac iechyd a diogelwch
• Gweithio gyda theuluoedd biolegol
• Diogelwch digidol ac ar y cyfryngau cymdeithasol

Pynciau (arbenigol) ychwanegol:

• Symud plentyn ymlaen i fabwysiadu
• Maethu therapiwtig
• Maethu rhiant a phlentyn
• Cefnogi plant sy’n ceisio lloches
• Gofalu am blant ag anghenion arbenigol

dulliau dysgu hyblyg

Rydym yn gwybod bod gan bob gofalwr maeth gwahanol amgylchiadau a chyfrifoldebau, felly nid oes dull hyfforddiant gofal maeth un maint i bawb. Yn lle hynny, rydym yn cynnig fformatau dysgu hyblyg sy’n darparu ar gyfer arddulliau dysgu amrywiol ac yn eich galluogi i wneud y gorau o’ch amser.

Gallwch ddewis o’r canlynol:

• Trafodaethau grŵp, gweithdai a digwyddiadau wyneb yn wyneb gyda’ch cymuned faethu leol
• Cyrsiau gweminar ar-lein y gallwch eu cwblhau o bell i gyd-fynd â’ch ymrwymiadau eraill
• Adnoddau hunan-dywys a argymhellir y gallwch eu darllen a’u gwylio ar eich cyflymder eich hun

olrhain eich cynnydd

Mae gan bob un o’n gofalwyr maeth gynllun dysgu personol, lle maent yn cadw golwg ar yr holl ddysgu maen nhw wedi’i gwblhau fel gofalwr maeth, neu hyfforddiant trosglwyddadwy o’ch gweithle neu rolau eraill. Dyma hefyd lle gallwch nodi unrhyw nodau ar gyfer y dyfodol a chynllunio datblygiad pellach.

Mae ein porth hyfforddiant digidol newydd yn gwneud cael mynediad at adnoddau, olrhain eich cynnydd, a chadw mewn cysylltiad â’ch tîm awdurdod lleol hyd yn oed yn haws.

adolygiadau blynyddol

Bob blwyddyn, byddwch yn cwrdd â’ch gweithiwr cymdeithasol goruchwyliol i adolygu eich anghenion hyfforddiant a’ch cofnod dysgu. Yn ystod y cyfarfod hwn, bydd y ddau ohonoch yn myfyrio ar eich dysgu yn y gorffennol, yn nodi meysydd lle rydych am ddatblygu ymhellach, ac yn llunio cynllun datblygu ar gyfer y dyfodol.

Wrth gwrs, nid oes angen i anghenion hyfforddiant aros tan eich trafodaeth flynyddol, gall eich ymweliadau goruchwylio rheolaidd fod yn gyfle i ddod o hyd i gyrsiau gwych i’ch helpu trwy gydol y flwyddyn.

O fagu eich hyder mewn meysydd penodol i ymgymryd â heriau newydd a dysgu gwybodaeth fwy arbenigol, bydd eich tîm awdurdod lleol yn eich cefnogi i dyfu eich rôl gofal maeth.

cymorth y tu hwnt i hyfforddiant maethu

Mae ein fframwaith dysgu a datblygu yn un elfen yn unig o’r cymorth parhaus y byddwch yn cael mynediad ato fel gofalwr maeth yn ein cymuned. Bydd eich tîm awdurdod lleol hefyd yn sicrhau bod gennych fynediad at weithwyr cymdeithasol profiadol pryd bynnag y bydd angen sgwrs arnoch, yn ogystal â grwpiau cymorth i ofalwyr maeth, cymorth cyfoedion a thîm cymorth 24/7.

Mae hefyd ddigon o ddigwyddiadau a chyfleoedd rhwydweithio sydd wedi’u cynllunio i ddod â chi’n agosach at eraill yn y gymuned faethu. Hefyd, byddwch yn gallu cael mynediad at gyfoeth o adnoddau ar-lein, fel y gallwch ddatblygu eich gwybodaeth a’ch sgiliau ymhellach.

Dysgwch fwy am ein cymorth a’n manteision.

digwyddiadau

Mae cynhadledd flynyddol Maethu Cymru yn dwyn ynghyd siaradwyr gwadd anhygoel o bob cwr o Gymru ac mae’n gyfle i ofalwyr maeth sgwrsio ag arbenigwyr pwnc wyneb yn wyneb.

cwestiynau cyffredin

beth yw hyfforddiant maethu?

Mae hyfforddiant gofal maeth – neu’r hyn yr ydym yn hoffi ei alw’n ddysgu a datblygu – yn cynnwys adnoddau addysgol, uwchsgilio, cyfleoedd rhwydweithio, a chymorth arbenigol. Mae wedi’i ddylunio i helpu gofalwyr maeth i fagu eu hyder a thyfu yn eu rôl.

beth yw hyfforddiant sgiliau i faethu?

Mae Sgiliau i Faethu’n rhaglen hyfforddiant maethu cyn cymeradwyaeth y mae darpar ofalwyr ledled y wlad yn cymryd rhan ynddi cyn iddynt ddechrau maethu.

Mae’n cael ei chyflwyno gan dimau awdurdod lleol ac wedi’i dylunio i amlinellu gwybodaeth allweddol am wahanol agweddau ar faethu, fel y gall ymgeiswyr gael gwell syniad o’r hyn i’w ddisgwyl os cânt eu cymeradwyo.

pa gymwysterau sydd eu hangen arnaf i faethu?

Nid oes angen unrhyw gymwysterau ffurfiol arnoch i faethu. Mae angen y gallu i ddarparu cartref gofalgar a chefnogol i bobl ifanc lle maen nhw’n teimlo’n ddiogel, yn ogystal ag ymrwymiad i hyrwyddo eich dysgu a’ch datblygu eich hun.

Wedi dweud hynny, os ydych wedi gwneud diogelu – neu unrhyw hyfforddiant perthnasol arall – trwy’r gwaith, byddwn yn ystyried bod y blwch dysgu a datblygu hwnnw wedi’i dicio.

pa mor hir mae’n ei gymryd i hyfforddi fel gofalwr maeth?

Mae’r broses gymeradwyo ar gyfer dod yn ofalwr maeth yn cymryd sawl mis; mae hyn yn cynnwys y cwrs hyfforddiant paratoi sydd fel arfer yn rhedeg dros 3 diwrnod llawn neu 6 noson.